Friday, September 27

Surat Untuk Menteri Sempena Minyak Naik!! hahaha



 KALAU TAK PAHAM SORI LA EK...
KOPIPES  DARI PESBUK



Namo sey ni KARIM... pongundi bordaftar DUN CHOMBUNG, 
PARLIMEN REMBAU. Sey tulis surat ni bukan apo2 do... 
sajo yor nak ucapkan timo kasih yg amek kat YB-YB
 sekalian sebab monaikkan rogo minyak hari tu... lopeh ni bilo rogo minyak naik,
rogo barang yang lain pun akan naik jugak laaa... banggo boto raso sey...
 macam duduk kek LAS VEGAS plak...

Sey janji dongan YB2 sumo,yang sey akan ubah tabiat sey dari makan 
ikan kombung yang dah merah monyalo mato eh dan pocah bodorai
 porut ikan tu pado ikan koring yor.. sey sanggup berkorban untuk negaro...

Anak sey yang 7 orang tu yang dah buleh buek team futsal tu buleh la 
borkojo lopeh sekolah, buek bantu omak ayah dorang ni haaa...
 kalau tak kojo pun buleh la jadi mat rempit kek SENAWANG tu ha... 
dapek jugakla duit sikit... buleh la monoruskan tradisi keluargo sey yang 
tak peghonah dorhako kek negaro yang sey cintai..

Raso2 eh, sey nak ubah suai bilik2 yang ado kek rumah sey....
 nak buek tompek bolo ikan dongan tanam sayur cagho hidroponik... 
sey torpakso tanam kek dalam bilik sobab sey tinggal dokek 
rumah flat yor (apo binche'eh)...

Rebet yang YB2 bagi kek sey molampuih lobih eh dari koporluan sey tu...
 bilo sey congak2 an, sey cumo guno 20sen yor duit minyak motor sohari...
 adalah untung 21 sen... bak kato si SAIDAH AF6 'okey la tuuuuuu'.
Team futsal sey tu, nak sughuh eksesais hari2 borjalan kaki tak pun
 naik basikal poi sokolah... adolah dalam 5 km... dokek yor tuuuuu...

Buek pormulaan nak ubah kehidupan sey.... sey takkan gunokan gulo bilo
 buek kopi.... takkan gunokan topung buek cokodok.... sey nak gantikan 
boreh dongan ubi... tiap2 hari sey dongan keluargo akan berposo
(kecuali hari2 yang diharamkan berposo)... itu antagho cagho sey
 ngubah an cagho hidup sey.. Ado banyak laie cagho... sumo kono negaro kito... 

dan sey mintak bebonar YB naikkan sokali rogo TOL sobab jiran sobolah 
sey ni orang pombangkang... dio solalu guno an highway... biar padan muko eh...
 bayarla tol banyak2... Jangan pulo diturunkan gaji montoghi2... 
sian diorang... anak bini nak makan apo... tak dapek
 nak 'menyoping' kek LANDEN...

Akhir kato... sey totap sokong YB2 sokalian...sey takkan sokong
 pombangkang... ntah apo2 ntah... Jangan lupo yor YB...
 naikkan rogo tol banyak2 biar orang sobolah rumah sey ni
 'tojoley lidah'eh nak bayar an...


sokian timo kasih...



pocah kaco, pocah goleh,

dah baco, harap baleh


6 comments:

Unknown said...

balas jangan tak balas..hahaha

lelamaisara said...

hehehhe...ado ado aje....

lupekanje said...

hahah...kelaka gak.. apo binche' eh...

Pokok Manggis Depan Rumah said...

hahaha...menarik ni. boleh hantar kat semua menteri macam ni.

Qhaifa Nur said...

apo nak di kato...redha sajolah..

Unknown said...

maaf. skadar bertanye .. ape maksud "apo binche'eh" tu?

Related Posts Plugin for WordPress, Blogger...